काठमाडौं– पछिल्लो २४ घण्टामा भएका विभिन्न विपदका घटनामा परी १ जनाको मृत्यु भएको छ भने ४ जना घाइते भएका छन् । 

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार देशभर पछिल्लो विवरणअनुसार ३१ वटा विपद्का घटना दर्ता भएका छन् । 

प्राधिकरणले सार्वजनिक गरेको तथ्यांकअनुसार हालसम्म २२ जिल्लामा यी घटनाहरू फैलिएका छन् । विभिन्न प्रकारका विपदमध्ये आगलागी सबैभन्दा बढी देखिएको छ, जसका २५ वटा घटना दर्ता भएका छन् ।

यसैगरी, सर्पदंश, चट्याङ, हावाहुरी तथा वन्यजन्तु आक्रमणका घटनासमेत भएका छन् । सर्पदंशबाट एक जनाको मृत्यु भएको जनाइएको छ । अन्य घटनामा ४ जना घाइते भएका छन् । 

विपद्का कारण करिब २९ लाख रुपैयाँ बराबरको क्षति भएको अनुमान गरिएको छ । राहत तथा उद्धारका लागि नेपाल प्रहरीसहितका सुरक्षा निकाय परिचालन गरिएको प्राधिकरणले जनाएको छ ।

प्राधिकरणले मौसम परिवर्तनसँगै यस्ता घटनाहरू बढ्न सक्ने भएकाले सतर्कता अपनाउन सर्वसाधारणलाई आग्रह गरेको छ ।