काठमाडौं– देशभर प्रिमनसुन सक्रिय भएसँगै मौसममा तीव्र उतारचढाव देखिन थालेको छ । 

बिहान मौसम सफा देखिए पनि दिउँसोपछि हावाहुरी, चट्याङ र वर्षा हुने क्रम बढ्दै गएको मौसमविद्हरूले बताएका छन् । जल तथा मौसम विज्ञान विभागका अनुसार आज अपरान्हपछि विशेषगरी मधेश, कोशी र लुम्बिनी प्रदेशका तराई क्षेत्रमा हावाहुरी चल्ने सम्भावना रहेको छ । यद्यपि हिजोको तुलनामा हावाको गति केही कम हुने अनुमान गरिएको छ।

विभागकी वरिष्ठ मौसमविद् विभूति पोखरेलले प्रिमनसुनको समयमा मौसम छिट्टै परिवर्तन हुने भएकाले पूर्वानुमानमा सामान्य फरक पर्न सक्ने बताइन् । उनका अनुसार हावाहुरीसँगै रूख ढल्ने, कमजोर संरचना तथा छाना उड्ने, विद्युत् र सञ्चार सेवा प्रभावित हुने जोखिम भने कायम नै रहनेछ ।

त्यसैगरी कर्णाली र सुदूरपश्चिम प्रदेशका पहाडी तथा हिमाली क्षेत्रमा एक–दुई स्थानमा भारी वर्षा र हिमपातको सम्भावना रहेको छ । अन्य प्रदेशका पहाडी र हिमाली क्षेत्रमा पनि मेघगर्जन, चट्याङ, असिना र मध्यम वर्षा हुने अनुमान गरिएको विभागले जनाएको छ । पश्चिमी न्यून चापीय प्रणालीसँगै स्थानीय वायुको प्रभावका कारण देशका विभिन्न भागमा एक्कासी मौसम बदली हुने क्रम जारी रहने देखिएको छ । 

मौसमविद्हरूका अनुसार प्रिमनसुनमा बिहान घाम लागे पनि अपरान्हपछि बदली, हावाहुरी र वर्षा हुनु सामान्य प्रक्रिया हो । विभागले हावाहुरी चल्ने समयमा घरभित्र सुरक्षित बस्न, खुला स्थान र कमजोर संरचनाबाट टाढा रहन तथा सतर्कता अपनाउन सर्वसाधारणलाई आग्रह गरेको छ । 

साथै, जोखिमबारे सचेत रहन तर अनावश्यक रूपमा नआत्तिन पनि अनुरोध गरिएको छ ।