काठमाडौं – गायक कृष्ण बिक र गायिका समिक्षा अधिकारीको स्वर रहेको ‘होरी’ बोलको गीतको सार्वजनिक गरिएको छ । सुदुरपश्चिममा चर्चामा रहेको भाकालाई राष्ट्रियकरण गर्नका लागि गायक कृष्ण र उनको टिमले लामो समयदेखिको प्रयासलाई होली गीत होरीका माध्यमबाट देखाउन खोजेका छन् ।

जसमा महानायक राजेश हमाल, पूर्व मिस नेपाल उषा खड्की, मनोज मर्हजन र बिन्दिया बुढाथोकीको अभिनय देख्न सकिन्छ । भक्तपुरका विभिन्न स्थानमा २ दिन लगाएर छायांकन गरिएको भिडियोले होली पर्वको सांस्कृतिक र परम्परागत महत्वलाई उजागर गरेको छ । सुदुरको संस्कृतिलाई विश्वसामु चिनाउने उदेश्यले लामो समयको प्रयासपछि ‘होरी’ आम दर्शक श्रोतामाझ आएको निर्देशक सरोज खड्का बताउँछन् ।

भिडियोमा राजेश र उषाका माध्यमबाट सुदुरपश्चिमको कला र संस्कृतिलाई देखाउने काम गरिएको छ । राम अबिरल बिष्टको शब्द सृजना रहेको गीतमा दीपक आरजेको संगीत रहेको छ ।

पवन सुस्लिगंको छायांकन रहेको गीतको सम्पादन मिलन श्रेष्ठले गरेका हुन् । देउसिंह ओराको कोरियोग्राफी रहेको होरी गायक स्वयम कृष्ण बिकको अफिसियल च्यानलबाट बजारमा आएको हो ।

कृष्ण डेढ दशकभन्दा बढी समयदेखि नेपाली संगीतमा सक्रिय गायक हुन् । उनका ‘आँखा मार्ने’ ‘रातो टिकी’ ‘उता हजुर मुसुक्कै, यता यो ज्यान भुसुक्कै’, ‘यानि माया’, ‘रानी माया’, ‘रातो टिकी’, ‘राधा पियारी’, ‘नीरमाया’सहित २ दर्जन बढी गीत बजारमा आईसकेका छन् । जसमध्ये उनका अधिकांश गीतहरु हिट छन् ।