काठमाडौं– भारतको सन्दर्भ जोड्दै पाकिस्तानका प्रधानमन्त्री शहबाज शरीफले ‘ट्रम्पले दक्षिण एसियालाई ठूलो विपत्तिबाट जोगाए’को बताएका छन् ।

वासिङ्टन डीसीमा आयोजित ‘बोर्ड अफ पीस’को पहिलो बैठकमा बोल्दै उनले अमेरिकी राष्ट्रपति डोनाल्ड ट्रम्पको प्रशंसा गरेका हुन्।

शरीफले राष्ट्रपति ट्रम्पको ‘सफल कूटनीति’ले विश्वभर शान्ति प्रवर्द्धन गर्न सहयोग पुगेको बताए। उनले ट्रम्पले समयमै हस्तक्षेप गरी पाकिस्तान र भारतबीच युद्धविराम गराउन भूमिका खेलेको दाबी गरे।

शरीफले भने, ‘तपाईंले (ट्रम्प)अत्यन्त प्रभावकारी ढंगले हस्तक्षेप गरेर पाकिस्तान र भारतबीच युद्धविराम गराउनुभयो, जसले लाखौं मानिसको ज्यान जोगायो।’

उनले ट्रम्पलाई ‘शान्तिका दूत’को संज्ञा दिँदै दक्षिण एसियालाई ठूलो विपत्तिबाट जोगाएको उल्लेख गरे। ‘तपाईं वास्तवमै दक्षिण एसियाका उद्धारकर्ता हुनुहुन्छ,’ उनले भने।

गाजासम्बन्धी पहलका लागि ट्रम्पद्वारा गठन गरिएको ‘बोर्ड अफ पीस’को यो पहिलो बैठक हो। उक्त बैठकमा पाकिस्तानसहित विभिन्न देशका नेताहरूको सहभागिता रहेको थियो।