नयाँ दिल्ली- अमेरिकी न्याय विभागले हालै सार्वजनिक गरेको ‘एपस्टीन फाइल’ मा भारतका केन्द्रीय पेट्रोलियम तथा प्राकृतिक ग्यास मन्त्री हरदीप सिंह पुरीको नाम उल्लेख भएपछि भारतीय संसद्‌मा राजनीतिक तरंग पैदा भएको छ।

विपक्षी सांसदहरूले संसद् भवन परिसरको मकर द्वार बाहिर प्रदर्शन गर्दै मन्त्री पुरीको राजीनामा माग गरेका छन्। उनीहरूले यौन अपराधी जेफ्री एपस्टीनसँग इमेल आदान–प्रदान भएको तथ्य सार्वजनिक भएपछि नैतिक जिम्मेवारी लिनुपर्ने बताएका छन्।

सार्वजनिक कागजातअनुसार सन् २०१४ र २०१५ बीच हरदीप सिंह पुरी र एपस्टीनबीच इमेलमार्फत धेरै पटक संवाद भएको देखिएको छ। यसले नयाँ विवाद जन्माएको छ, किनकि एपस्टीनलाई सन् २००८ मै यौन अपराधसम्बन्धी मुद्दामा दोषी ठहर गरिएको थियो।

यस विषयमा प्रतिक्रिया दिँदै मन्त्री पुरीले आफ्नो एपस्टीनका आपराधिक गतिविधिसँग कुनै सम्बन्ध नरहेको स्पष्ट पारेका छन्। उनले इमेल सम्पर्क सामान्य प्रकृतिको रहेको र कुनै अवैध गतिविधिसँग जोडिएको नभएको दाबी गरेका छन्।

अमेरिकी न्याय विभागले सार्वजनिक गरेको दस्तावेजबारे थप विवरणहरू क्रमशः बाहिर आउने क्रम जारी रहेको छ। विपक्षले भने सम्पूर्ण तथ्य सार्वजनिक गरी पारदर्शी छानबिन हुनुपर्ने माग दोहोर्‍याएको छ।