काठमाडौँ– काठमाडौंको वसन्तपुरस्थित हनुमानढोका दरबारको मूलचोकमा दसैँको महानवमीका दिन बोका र राँगाको बलि दिइएको छ।

नेपाली सेनाका सैनिकहरूले देवीदेवताप्रति अर्पणस्वरूप बोका र राँगाको बलि दिएका हुन्। दसैँका अवसरमा हनुमानढोका दरबारको मूलचोकमा महाअष्टमी, महानवमी र चतुर्दशीका दिन बलि दिने परम्परा रहेको छ।

परम्पराअनुसार दसैँका अवसरमा मूलचोकमा तीन दिनसम्म दैनिक ५४ वटा बोका र ५४ वटा राँगाको बलि चढाइन्छ।

दसैँ असत्यमाथि सत्य र खराबीमाथि असलको विजयको प्रतीकका रूपमा मनाइने नेपालको प्रमुख हिन्दु पर्व हो। महानवमीका दिन देशभरका देवी मन्दिरमा विशेष पूजा, आराधना तथा बलि दिने चलन छ।

यस दिन कतिपय मन्दिरमा भैँसी, बोका, हाँस र कुखुराको बलि दिइन्छ भने केही भक्तजनले फलफूल तथा तरकारी अर्पण गरेर प्रतीकात्मक रूपमा पूजा गर्ने गर्छन्।