काठमाडौँ ‍- राष्ट्रपति रामचन्द्र पौडेलले बडा दसैँ २०८३ का अवसरमा राष्ट्रपति भवन शीतल निवासमा मंगलबार नवकन्याहरूको (नौ जना कन्या) विधिपूर्वक पूजाअर्चना गरेका छन्।

बडादसैँको अवसरमा नवदुर्गाको अवतार स्वरूप राष्ट्रप्रमुखले नवकन्याको पूजाअर्चना गर्ने परम्परा रहँदै आएको छ। सोही परम्परा अनुसार राष्ट्रपति पौडेलले प्रथम महिला सबिता पौडेलसहित नवकन्याहरूको पूजाअर्चना गरेका हुन् ।

सनातन परम्परा अनुसार दुर्गा भगवतीका नौ रूपहरू- शैलपुत्री, ब्रह्मचारिणी, चन्द्रघण्टा, कुष्माण्डा, स्कन्दमाता, कात्यायनी, कालरात्री, महागौरी र सिद्धिदात्रीको अवतार मानेर कन्याहरूको पूजा गर्ने गरिन्छ।

सो अवसरमा राष्ट्रपति पौडेलले नवकन्याको गोडा धोएर, टीका-जमरा लगाइदिनुका साथै उपहार र दक्षिणासमेत प्रदान गरेका छन् ।