पाँचथर – नेपाली कांग्रेसको १५औँ महाधिवेशनअन्तर्गत पाँचथरका ६० वटै वडामा सर्वसम्मत रूपमा नेतृत्व तथा प्रतिनिधि चयन गरिएको छ ।

जिल्ला सभापति रूपनारायण जवेगुका अनुसार शनिबार ४१ र आइतबार १९ वटा वडामा सर्वसम्मत रूपमा निर्वाचन प्रक्रिया सम्पन्न भएको हो ।

कांग्रेस जिल्ला नेता दीपक नेपालका अनुसार जिल्लाका कुनै पनि वडामा पक्ष–विपक्षबीच विवाद वा प्रतिस्पर्धाको अवस्था देखिएन। सबै पक्षबीच सहमति जुटाएर सर्वसम्मत रूपमा वडा अधिवेशन सम्पन्न गरिएको उनले बताए ।

पाँचथरमा एउटा नगरपालिका र सातवटा गाउँपालिका छन्। ती स्थानीय तहअन्तर्गत ६० वटा वडा रहेका छन् । सबै वडामा सर्वसम्मत नेतृत्व चयन भएसँगै जिल्लाको वडा अधिवेशन प्रक्रिया पूरा भएको कांग्रेसले जनाएको छ ।