दोलखा– नेपाली कांग्रेसको १५औँ महाधिवेशनअन्तर्गत दोलखाका नौवटा स्थानीय तहका ७४ वडामा जारी वडा अधिवेशनमध्ये आइतबार दिउँसो ३ बजेसम्म ६० वटा वडाको अधिवेशन सम्पन्न भएको छ । 

बाँकी १४ वडाको अधिवेशन तथा नतिजा आउन बाँकी रहेको नेपाली कांग्रेस दोलखाले जनाएको छ । अधिवेशन सम्पन्न भएका वडामध्ये भिमेश्वर नगरपालिकाका ९ वटै वडा, जिरी नगरपालिकाका ९ वटै वडा, वैतेश्वर गाउँपालिकाका ८ वटै वडा, मेलुङ गाउँपालिकाका ७ वटै वडा, तामाकोशी गाउँपालिकाका ७ वटा वडा र कालिञ्चोक गाउँपालिकाका ९ वटै वडा रहेका छन् ।

त्यसैगरी गौरीशंकर गाउँपालिकाका ८ वडामध्ये ४ वडाको अधिवेशन दिउँसो ३ बजेसम्म सम्पन्न भएको छ भने बाँकी वडामा अधिवेशन जारी रहेको कांग्रेसले जनाएको छ । शैलुङ गाउँपालिकाका ८ वडामध्ये ६ वडाको अधिवेशन सम्पन्न भएको छ । शैलुङका वडा नम्बर ५ र ६ को अधिवेशन सोमबार हुने बताइएको छ ।

विगु गाउँपालिकामा वडा नम्बर ६ को अधिवेशन सम्पन्न भएको छ भने अन्य ७ वडाको अधिवेशनको नतिजा आउन बाँकी रहेको जनाइएको छ ।

शनिबार सुरु हुन नसकेका केही वडाको अधिवेशन आइतबार बिहानदेखि जारी रहेको छ । गौरीशंकर गाउँपालिकाका केही वडाको अधिवेशनसमेत असोज ६ गते गर्ने तयारी रहेको कांग्रेसले जनाएको छ । 

वडा अधिवेशनबाट वडा कार्यसमिति चयनसँगै क्षेत्रीय प्रतिनिधिसमेत चयन हुने नेपाली कांग्रेसको विधानमा व्यवस्था छ । वडा अधिवेशन सम्पन्न भएपछि नेपाली कांग्रेसको पालिका अधिवेशन असोज ७ गते हुने निर्वाचन कार्यतालिका रहेको छ । सुवाश बस्नेत/दोलखा