काठमाडौं– अभिनेत्री उपासना सिंह ठकुरीको मुख्य भूमिका रहेको नयाँ नेपाली फिल्म ‘जलाकी’को फष्टलुक टिजर सार्वजनिक गरिएको छ । 

आगामी मंसिर ४ गतेदेखि प्रदर्शनमा आउने फिल्मको टिजरले कलेज जीवनमा उम्रिएको एकतर्फी प्रेम र त्यसबाट जन्मिने अधुरो प्रेमकथातर्फ संकेत गरेको छ ।

टिजरमा उपासनालाई कलेज पढ्ने युवतीको भूमिकामा देखाइएको छ । उनको अभिनेता सोनम तोप्देनसँग एकतर्फी प्रेम बसेको दृश्यलाई केन्द्रमा राखिएको छ । सोनमप्रतिको उपासनाको आकर्षण र भावनात्मक अवस्थालाई प्रस्तुत गरिएको टिजरले फिल्मको कथा कलेज जीवनको प्रेम, भावना र त्यसको अपूर्ण यात्राको वरिपरि घुम्ने संकेत गर्छ ।

अशोक थापा मगरको निर्देशन तथा लेखन रहेको फिल्ममा उपासना र सोनमसँगै शिल्पा मास्के, अस्तित्व भट्टचन, साहारा हाङमा लिम्बू, राजु रेग्मी मगर, भावना मगर, माओत्से गुरुङ, बुद्धि तामाङ, उषा खड्गी र खड्कबहादुर पुन (खबपु) लगायतको अभिनय छ। अभिनेता तथा क्याप्टेन विजय लामा फिल्ममा विशेष भूमिकामा देखिनेछन् । 

एम मिडिया प्रोडक्सनको प्रस्तुतिमा बनेको ‘जलाकी’का निर्मातामा बेताने मगर (बबिता राना), ओम घर्ती मगर, वीरबहादुर लामा, चन्द्रबहादुर भट्टचन, मानबहादुर धनाह मगर र सुस्मिता बुढाथोकी छन् ।

फिल्मको छायांकन शैलेन्द्र डी कार्कीले गरेका छन् भने सम्पादन अशोक थापा मगरको रहेको छ। संगीततर्फ सरित रयान र एसडी योगी जोडिएका छन्। सार्वजनिक टिजरले फिल्मप्रति विशेषगरी कलेज जीवन र प्रेमकथामा रुचि राख्ने दर्शकको चासो बढाउने संकेत गरेको छ।