काठमाडौं- जापानको आइची-नागोयामा आयोजित २०औँ एसियाली खेलकुद प्रतियोगिताको औपचारिक उद्घाटन भएको छ। नागोयास्थित मिजुहो पार्क रङ्गशालामा शनिबार आयोजित विशेष समारोहमा जापानका सम्राट नारुहितोले प्रतियोगिताको उद्घाटन गरेका हुन्।

विविध सांस्कृतिक प्रस्तुति र सङ्गीतबीच आयोजित उद्घाटन समारोहको मार्चपासमा नेपालका तर्फबाट बक्सर चन्द्रबहादुर थापामगर र महिला कबड्डी खेलाडी मानमती विष्टले राष्ट्रिय ध्वजा वाहकका रूपमा टोलीको नेतृत्व गरेका थिए ।

थापामगर गत वर्षको विश्व बक्सिङ च्याम्पियनसिपका कास्य पदक विजेता हुन् भने विष्ट सन् २०२३ मा चीनको हाङझाउमा सम्पन्न १९औँ एसियाडमा कास्य पदक जित्न सफल नेपाली महिला कबड्डी टोलीकी सदस्य हुन्।

राष्ट्रिय खेलकुद परिषद् (राखेप) का सदस्य-सचिव रामचरित्र मेहताका अनुसार यसपटकको एसियाली खेलकुदमा नेपालबाट २१ खेलमा १३५ जना खेलाडीले प्रतिस्पर्धा गर्दैछन् । जसमा ५७ महिला र ७८ पुरुष खेलाडी रहेका छन्।

एसियाडको यस २०औँ संस्करणमा एसियाका कुल ४५ राष्ट्रका साथै एक शरणार्थी टोलीका खेलाडीहरूले सहभागिता जनाएका छन्।