काठमाडौँ – नेपाली कम्युनिस्ट पार्टी (नेकपा) का नेता वर्षमान पुनले वर्तमान वालेन्द्र शाह (बालेन) नेतृत्वको सरकार स्वेच्छाचारी, निरङ्कुश र गैरजिम्मेवार बनेको आरोप लगाउँदै दशैँ, तिहार र छठपछि सरकारविरुद्ध जनता विद्रोहमा उत्रने दाबी गरेका छन्।

नेकपा गण्डकी प्रदेश सम्पर्क समितिद्वारा शनिबार काठमाडौँमा आयोजित कार्यक्रममा बोल्दै नेता पुनले चाडपर्वपछि सरकारविरुद्ध ठूलो विद्रोह हुने भएकाले त्यसको नेतृत्व र व्यवस्थापनका लागि अहिल्यैदेखि तयार रहन पार्टी पंक्तिलाई निर्देशन दिए।

विगत ३५ वर्षमा केही भएन भन्दै भ्रामक प्रचार गरेर सत्तामा पुगेकाहरू प्राकृतिक विपद्पछिको उद्धार, राहत तथा किसानका आधारभूत समस्या समाधानमा पूर्णतः असफल भएको उनले टिप्पणी गरे। “३५ वर्षमा के गरे भनेर प्रश्न गर्नेहरूको सरकारले रसुवा बाढीपछि उद्धार र राहतमा के गर्‍यो? जनताको चुल्होमा ग्यास र किसानलाई मल खोई? महँगीले आकाश छोएको छ,” उनले भने, “यो असफल सरकारविरुद्ध जनतामा आक्रोश बढेको छ। पर्वलगत्तै जनता स्वतःस्फूर्त सडकमा आउँछन्, हामीले त्यसको व्यवस्थापन गर्नुपर्छ।”

सरकारको गलत नीतिका कारण राष्ट्रियता र स्वाधीनता कमजोर बनेको दाबी गर्दै उनले विगत ३५ वर्षलाई ‘अभिशाप’ भन्नेहरूले नै सोही अवधिमा उच्च प्रशासनिक र सैनिक नेतृत्वमा रहेकाहरूलाई खोजी-खोजी राजदूतजस्ता महत्त्वपूर्ण पदमा नियुक्ति दिएको आरोप लगाए।

राष्ट्रिय स्वतन्त्र पार्टी (रास्वपा) ले ‘थ्री डी’ अर्थात् ‘युथ डेमोग्राफी’, ‘डिजिटल ट्रान्सफर्मेशन’ र ‘डायस्पोरा’ को प्रयोग गरी स्थापित दलहरूविरुद्ध भ्रम फैलाउन सफल भएको बताउँदै पुनले आफूहरू पनि ती क्षेत्रमा बलियो उपस्थिति जनाउने कार्ययोजनासहित अघि बढेको उल्लेख गरे।

आगामी महाधिवेशनपछि पार्टीका सबै संरचनामा ५० प्रतिशत युवा सहभागिता सुनिश्चित गरिने र १५ देखि ३९ वर्ष उमेर समूहलाई नेतृत्वदायी भूमिकामा ल्याइने उनले प्रतिबद्धता जनाए।