काठमाडौं- प्रधानमन्त्री वालेन्द्र शाहले आफ्ना सल्लाहकार अशिम शाहलाई खटाएर नेपालको संविधानका अधिकांश धारा पुनर्लेखन गर्न खोजिरहेका छन्। दलहरूले बहिष्कार गरे पनि शाह नेतृत्वको समिति संविधान संशोधन गरिछाड्ने मुडमा छ।

तर सत्तारुढ राष्ट्रिय स्वतन्त्र पार्टीका सभापति रवि लामिछानेले भने संविधान संशोधन सजिलो नरहेको बताएका छन् ।

उनले प्रतिनिधि सभाको दुईतिहाइ बहुमतले मात्रै संविधान संशोधन नहुने स्वीकारोक्ति गरेका हुन् ।

बिहीबार राज्य व्यवस्था तथा सुशासन समितिको बैठकमा उपस्थित पूर्वगृहमन्त्री लामिछानेलाई राष्ट्रिय प्रजातन्त्र पार्टीका सांसद ज्ञानबहादुर शाहीले संविधान संशोधन गर्ने भए दुईतिहाइ बहुमतका लागि आफूले साथ दिने बताएका थिए । तर रविले शाहीलाई जवाफ फर्काउँदै लामिछानेले प्रतिनिधि सभाको दुईतिहाइले मात्रै संविधान संशोधन सम्भव नरहेको जवाफ दिएका हुन् ।

‘प्रतिनिधि सभामा दुईतिहाइ बहुमत पुग्दैमा संविधान संशोधन गर्दैनौँ भन्ने त पक्कै पनि होइन, त्यो हामी सबैलाई थाहा छ’, उनले भने, ‘संविधान संशोधनका लागि प्रतिनिधि सभाको मात्र दुईतिहाइले हुन सक्दैन। यी लगायत कुराहरूलाई हामीले अवश्य ध्यान दिनुपर्छ।’

संसदीय समितिको बैठकमा कुनै पनि व्यक्तिमाथि प्रश्न उठाउँदा उसको पदीय मर्यादालाई पनि ख्याल गर्नुपर्ने लामिछानेले सांसदहरूलाई सुझाएका छन् । रास्वपाकै सांसद खगेन्द्र सुनारले समितिको बैठकमा आईजीपी दानबहादुर कार्कीबारे आपत्तिजनक शैलीमा बोलेपछि लामिछानेले यस्तो भनेका हुन् ।

‘आवाज ठूलो हुँदैमा तथ्य ठूलो हुने होइन’, लामिछानेले भने, ‘प्रमाणहरू यति बलियो होउन् कि हामीले मुख रातो पारेर प्रश्न गर्न नपरोस्, प्रमाण देखेर आउनेहरूको मुख रातो होस् ।’