काठमाडौं- नेपाली कम्युनिस्ट पार्टीका सह-संयोजक माधवकुमार नेपाल बिरामी भएका छन् । ज्वरो आएर घरमै आराम गर्नुपरेपछि सम्भावित प्रदेश सरकारबारेको संयोजक पुष्पकमल दाहाल प्रचण्डसँगको छलफल रोकिएको छ।

श्रीलंका भ्रमणपछि फर्किएका संयोजक प्रचण्डले आइतबार नेपाललाई भेटेर प्रदेश सरकारको सत्ता सहकार्यबारे साझा धारणा बनाउने तयारी थियो ।

प्रचण्डका प्रेस सल्लाहकार गोविन्द आचार्यका अनुसार नेपाल बिरामी भएपछि उनीहरूको भेटघाट स्थगित गरिएको हो।

प्रचण्ड र माधव नेपाल भेटेपछि मात्रै प्रदेश सरकारको विषयमा थप निर्णयका लागि नेपाली कांग्रेसका सभापति गगन थापासँग छलफल गर्ने तयारी थियो ।

प्रचण्ड-माधव भेटवार्ता स्थगित भएपछि गगनसँगको वार्ता धकेलिएको हो । यी दुई नेताबीच सोमबार छलफल हुने बताइएको छ। प्रचण्ड र माधवबीच वार्ता भएपछि मात्रै गगनसँग सम्भावित सत्ता साझेदारीबारे कुरा हुने आचार्य बताउँछन् ।