काठमाडौं – गत शुक्रबारबाट प्रदर्शनमा आएको फिल्म ‘गौँथली’का कलाकारलाई भेटेर दर्शक रोएको भिडियो सामाजिक सञ्जालमा देखिन थालेको छ ।

इमोसनल फिल्मको प्रचारको कडी नै दर्शकले कलाकारलाई भेटेर रोएको दृश्य बन्ने अवस्थामा छ । निर्माण पक्षको नियतले नै ती भिडियोहरू बाहिर आउँछन् ।

‘गौँथली’को हकमा पनि त्यही भएको छ । राम्रै हाइप बनाएर प्रदर्शनमा आएको यो फिल्मले सुरुवाती तीन दिनमा दर्शकबाट राम्रै साथ पाएको छ ।

शुक्रबारभन्दा शनिबार दर्शकको संख्या बढेको थियो । आइबार भने बुकिङ झनै राम्रो देखिएको छ । देशभरका एक दर्जनभन्दा बढी हल हाउसफुल भएको देखिन्छ ।

आजको सार्वजनिक बिदामा फिल्मले दर्शकबाट राम्रो साथ पाएको हो ।

अब माउथ पब्लिसिटीका लागि पर्याप्त दर्शक फिल्मले पाइसक्यो । भोलिका दिनबाट फिल्मको व्यापार ओरालो लागे ‘दर्शकले मन नपराएको’रुपमा बुझिनेछ ।

कपिल रिजालको निर्देशनमा बनेको यस फिल्मको नायक अरुण क्षेत्री र नायिका सिम्रन खड्का हुन् ।