काठमाडौं – अमेरिका र इरानबीच भएको नयाँ सम्झौतापछि अमेरिकाले इरानी बन्दरगाहमाथि लगाएको नौसैनिक नाकाबन्दी हटाएको छ। दुवै देशबीच सम्झौतामा हस्ताक्षर भएको केही समयपछि अमेरिकी प्रशासनले उक्त निर्णय कार्यान्वयनमा ल्याएको हो।

अमेरिकी सेन्ट्रल कमाण्ड (सेन्टकम) ले सामाजिक सञ्जाल एक्समार्फत राष्ट्रपति डोनाल्ड ट्रम्पको निर्देशनअनुसार इरानी बन्दरगाह तथा तटीय क्षेत्रमा आवतजावत गर्ने जहाजमाथिको नाकाबन्दी हटाइएको जनाएको छ।

सेन्टकमका अनुसार अब अमेरिकी सेनाले इरानी बन्दरगाहतर्फ जाने वा त्यहाँबाट फर्कने जहाजहरूलाई रोक्ने छैन। साथै नौसैनिक नाकाबन्दी कार्यान्वयनसँग सम्बन्धित सबै गतिविधि बन्द गरिएको छ। यद्यपि सम्झौताका प्रावधानहरूको पालना सुनिश्चित गर्न अमेरिकी युद्धपोतहरू भने सम्बन्धित क्षेत्रमा रहने जनाइएको छ।

यसअघि मध्यस्थकर्ताको भूमिकामा रहेका पाकिस्तानका प्रधानमन्त्री शहबाज शरीफले सम्झौता तत्काल प्रभावबाट लागू हुने बताएका थिए। उनले सम्झौताको पहिलो चरणअन्तर्गत इरानले होर्मुज जलडमरूमध्य पुनः सञ्चालनमा ल्याउने र अमेरिकाले इरानमाथिको नौसैनिक नाकाबन्दी हटाउने जानकारी दिएका थिए।

अमेरिका र इरानबीचको यो सहमतिलाई क्षेत्रीय तनाव कम गर्ने तथा अन्तर्राष्ट्रिय जलमार्गमा व्यापारिक आवागमन सहज बनाउने महत्वपूर्ण कदमका रूपमा हेरिएको छ।