काठमाडौँ । सशस्त्र प्रहरीले ललितपुरको महालक्ष्मी नगरपालिका-७, चाँगाथलीमा नक्कली ब्राण्डेड मदिरा बनाउने ठाउँमा छापा मारेको छ।

सो स्थानबाट ठूलो मात्रामा रेडलेबल, ब्ल्याक लेबललगायत महँगा ब्राण्डेड रक्सीका लेबल लगाइएका मदिराहरू बरामद गरिएको सहप्रवक्ता शैलेन्द्र थापाले जानकारी दिए।

उनका अनुसार सशस्त्र प्रहरी बल नेपाल इन्टेलिजेन्स ब्युरोको विशेष सूचनाका आधारमा सोही ठाउँमा रहेको विर्खबहादुर तामाङको घरमा अवैधरूपले नक्कली ब्राण्डेड मदिरा तयार गरिरहेका चार जनालाई समेत नियन्त्रणमा लिइएको छ।

पक्राउ पर्नेमा रामेछाप खाँडादेवी गाउँपालिका-२ बस्ने ३० वर्षीय मनोज खत्री, खिम्ति गाउँपालिका बस्ने २८ वर्षीय विनोद तामाङ, २६ वर्षीय विवेक तामाङ र सिन्धुपाल्चोकको बाह्रविसे नगरपालिका–६ बस्ने २२ वर्षीय छिदेन निमा तामाङ छन्।

सोही ठाउँबाट रक्सी बनाउन प्रयोग हुने केमिकल तथा उपकरण, राजश्वको स्टिकर र होलोग्रामसमेत बरामद गरिएको डीएसपी थापाले बताए। बरामद रक्सी ठूलो परिमाणमा भएका यकिन गर्न नसकिएको उनको भनाइ छ।

नियन्त्रणमा लिइएकाहरूलाई बरामद सामानसहित आवश्यक कारबाहीको लागि सम्बन्धित निकायमा बुझाउने प्रक्रियामा रहेको सशस्त्र प्रहरीले जनाएको छ।