काठमाडौं । प्रहरीमा उजुरी दिन अब प्रहरी कार्यालय धाउनुपर्ने अवस्थाको अन्त्य भएको छ । प्रहरी महानिरीक्षक (आईजीपी) दानबहादुर कार्कीले मंगलबार ‘प्रहरी एप’ मार्फत नै पीडितले उजुरी दिन सक्ने व्यवस्थाको सुरु भएको जानकारी दिए ।

नेपाल प्रहरी रणनीति योजना २०८३–२०८५ सार्वजनिक गर्दै पीडितले आफू पीडित भएको प्रमाणसहितको उजुरी प्रहरी एपमार्फत नै गर्न सकिने जनाएका हुन् । अब कार्यालय आउनुपर्ने अवस्थाको अन्त्य भएको उनले बताए ।

उजुरी गर्न सकिने एपको समेत आईजीपी कार्कीले मंगलबारदेखि सुरु भएको जनाएका छन् । अब पीडितले उजुरी गर्न नेपाल प्रहरीको एप डाउनलोड गरेर मागिएको विवरणअनुसारको प्रमाणसहितको उजुरी र घटनास्थलको लोकेसन क्लिक गरेर पठाउनु पर्नेछ ।

घटनास्थलको लोकेसन छानेपछि भने त्यो लोकसनमा पर्ने प्रहरी कार्यालयमा उजुरी दर्ता हुनेछ । सोही उजुरीबारे प्रहरीले एपमार्फत नै पीडितलाई अनुसन्धान प्रक्रियाबारे जानकारी गराउने छ ।

आईजीपी कार्कीले एप सार्वजनिक गर्दै भने, “अब उजुरी दिन प्रहरी कार्यालय धाउनुपर्ने अवस्थाको अन्त्य भएको छ । हामी डिजिटल रेकर्डमा गएका छौँ । अब पीडितको फाइल प्रहरीको घर्रामा हरोउने छैन । पीडितको उजुरीबारे एपमार्फत नै जानकारी गराइने छ । त्यसको सुरुआत हामीले गरेका छौँ ।”

प्रहरी एपको उद्घाटनबाहेक आईजीपी कार्कीले प्रहरीको संगठनको अल्पकालीन लक्ष्य, दीर्घकालीन लक्ष्य र रणनीतिक सुधारका क्षेत्र तथा लक्ष्यहरू सार्वजनिक गरेका छन् ।

जसअन्तर्गत अल्पकालीन कार्ययोजनाअनुसार प्रहरी संगठनको नीतिगत तथा कानुनी सुधार, समुदाय प्रहरी सहकार्य सृदृढ, समस्या र पूर्वानुमानमा आधारित अपराध रोकथाम तथा नियन्त्रण राखिएको छ । त्यस्तै, जनशक्तिको सेवा विशिष्टीकृत, प्रहरी प्रशासन कार्यदक्षता तथा कार्य प्रभावकारिता सुधार र सुपरिवेक्षण अनुगमन विकास र कार्यान्वयन राखिएको छ ।

दीर्घकालीन लक्ष्यअनुसार समाजमा शान्ति सुव्यवस्था, पारदर्शी प्रहरीद्वारा जनविश्वस, अपराधको रोकथाम, दक्ष नैतिकवान्, सुदृढ पूर्वाधार र कार्यवातावण राखिएको छ ।

रणनितिक क्षेत्रहरूमा नीति योजना र अन्तर्राष्ट्रिय समन्वय, शान्तिसुरक्षा प्रहरी कारबाही तथा विपद् व्यवस्थापन, अपराध रोकथाम तथा नियन्त्रण, अपराध अनुसन्धान, भौतिक पूर्वाधार, मानवस्रोत विकास, सूचना प्रविधि लगायतका योजना समावेश गरिएको छ ।