काठमाडौं– बलिउड अभिनेता सलमान खान फेरि एक पटक सामाजिक सञ्जालमा चर्चाको केन्द्र बनेका छन्। मे १७ मा उनले सेयर गरेको एक शर्टलेस फोटो र त्यससँग लेखिएको ‘अकेला र तन्हा’ क्याप्सनले फ्यानहरूबीच चिन्ता र विभिन्न अड्कलबाजी सिर्जना गरेको थियो।

६० वर्षको उमेरमा पनि फिटनेसका कारण चर्चित सलमानको उक्त पोस्ट सार्वजनिक भएलगत्तै सामाजिक सञ्जालमा उनको व्यक्तिगत जीवन, सम्बन्ध र मानसिक अवस्थाबारे चर्चा चुलिएको थियो। केही प्रयोगकर्ताले उनलाई एक्लोपनको अवस्थाबारे अनुमान समेत लगाएका थिए।

तर बढ्दो हल्लापछि सलमान आफैंले नयाँ पोस्टमार्फत स्पष्टिकरण दिएका छन्। उनले आफू आफ्नो अवस्थाबारे नभई सामान्य भावनात्मक अभिव्यक्ति मात्र गरेको बताएका छन्। सलमानले लेखेका छन्, ‘म आफ्नो बारेमा कुरा गरिरहेको थिइनँ। यति ठूलो परिवार, साथीहरू र शुभेच्छुकहरू हुँदा म कसरी एक्लो हुन सक्छु?’

उनले कहिलेकाहीँ व्यस्त जीवनबाट केही समय अलग भएर आफ्नै लागि समय निकाल्ने चाहना मात्र व्यक्त गरेको पनि स्पष्ट पारेका छन्।

सलमानले मजाक गर्दै एउटा फोटोले नै ठूलो चर्चा सिर्जना गरेको भन्दै आफ्नी आमाले समेत ‘के भयो बेटा?’ भनेर सोधेको अनुभव सुनाएका छन्। उनको यो स्पष्ट र सहज प्रतिक्रियापछि सामाजिक सञ्जालमा फेरि सकारात्मक चर्चा सुरु भएको छ।

सलमान खानको व्यक्तिगत जीवन लामो समयदेखि चर्चामा रहँदै आएको छ। विगतमा उनको नाम संगीता बिजलानी, कट्रिना कैफ र ऐश्वर्या रायसँग जोडिएको थियो। ऐश्वर्यासँगको सम्बन्ध र त्यसपछिको ब्रेकअप बलिउडका चर्चित विषयमध्ये एक मानिन्छ। हाल उनको नाम युलिया भन्तुरसँग जोडेर हेरिँदै आएको छ।