अछाम– अछामको तुर्माखाँद गाउँपालिका–३ भैरवस्थानस्थित बल्दे नजिक कर्णाली नदीमा बेपत्ता भएका बुबाछोराको शव फेला परेको छ।

मृत्यु हुनेमा स्थानीय ३५ वर्षीय पहलसिंह बूढा र उनका १३ वर्षीय छोरा नरी बूढा रहेका छन्। दुवैजना वैशाख ३ गते डुङ्गा पल्टिँदा नदीमा बेपत्ता भएका थिए।

उनीहरू कर्णालीपारि सुर्खेतको पञ्चपुरी नगरपालिका–७ स्थित वनबाट घाँस काटेर फर्कने क्रममा डुङ्गा दुर्घटनामा परेका थिए। दुर्घटनापछि उनीहरूको खोजीकार्य जारी राखिएको थियो।

सुर्खेतबाट खटिएको सशस्त्र प्रहरी नायब निरीक्षक चेतन राजकोटी नेतृत्वको ६ सदस्यीय गोताखोर टोली र नं. ४९ गुल्म हेडक्वाटर खप्तड अछामबाट सशस्त्र प्रहरी सहायक निरीक्षक खेमराज खतिवडाको नेतृत्वमा रहेको विपद् व्यवस्थापन टोलीले घटनास्थलदेखि करिब ५०० मिटर टाढा पानीमुनिबाट शव निकालेको हो।

जिल्ला प्रहरी कार्यालय अछामका प्रहरी नायब उपरीक्षक ओमप्रकाश खनालका अनुसार दुवै शव फेला पारेर आवश्यक कानुनी प्रक्रिया अघि बढाइएको छ।