काठमाडौं- भारतीय नौसेना सी ड्रागन २०२६ नामक अभ्यासमा सहभागी भएको छ । यो अमेरिकी नौसेनाको नेतृत्वमा सञ्चालित बहुपक्षीय पनडुब्बी प्रतिरोधी युद्ध अभ्यास हो ।

यो अभ्यास मार्च महिनाभर गुआमस्थित एन्डर्सन एयर फोर्स बेसमा सञ्चालन भइरहेको छ । नौसैनिक अभ्यासमा भारतसँगै अमेरिका, अष्ट्रेलिया, जापान र न्युजिल्याण्डका जलसेना र वायुसेना सहभागी छन् ।

यसको मुख्य उद्देश्य इन्डो-प्यासिफिक क्षेत्रमा सामुद्रिक सुरक्षा र पनडुब्बी विरुद्धको क्षमता बढाउनु रहेको भारतीय समाचार संस्था एएनआईले जनाएको छ । यसले मित्र राष्ट्रहरूबीचको आपसी सहयोग र समझदारीलाई अझ बलियो बनाउने विश्वास गरिएको छ ।

अष्ट्रेलियाले यस अभ्यासका लागि आफ्नो पी-८ए पोसाइडन विमान र ५० जना सैनिकको टोली पठाएको छ । यस अभ्यासमा सहभागी टोलीहरूले जटिल युद्धकालीन परिस्थितिहरूको सामना गर्नेछन् ।

उनीहरूले समुद्रमुनि रहेका पनडुब्बीहरू पहिचान गर्ने र पछ्याउने कलाको प्रशिक्षण लिनेछन् । विज्ञहरूका अनुसार यो अभ्यासले सहभागी राष्ट्रहरूको प्रविधि र रणनीतिलाई थप परिष्कृत बनाउनेछ ।