धादिङ- धादिङ क्षेत्र नम्बर २ राष्ट्रिय स्वतन्त्र पार्टीकी सांसद आशिका तामाङले सवारीसाधनमा लगाइएको कर बन्द गर्न दिएको निर्देशनप्रति जिल्लाका १३ वटै स्थानीय तहले आपत्ति जनाएका छन्।

नीलकण्ठ नगरपालिकाका मेयर भीमप्रसाद ढुंगाना नेतृत्वमा बसेको नगरप्रमुख, अध्यक्ष तथा उपाध्यक्षहरूको संयुक्त बैठकले उक्त निर्देशनलाई स्थानीय तहको संवैधानिक अधिकारमाथि ठाडो हस्तक्षेप भएको ठहर गरेको छ । बैठकले आशिकाविरुद्ध प्रतिवादमा उत्रिने चेतावनी पनि दिएको छ।

बैठकले संविधानको धारा २३३(१) अनुसार संघ, प्रदेश र स्थानीय तहबीचको सम्बन्ध सहकारिता, सहअस्तित्व र समन्वयमा आधारित हुनुपर्ने व्यवस्थालाई सम्झाएको छ ।

संविधानको अनुसूची–८ ले सुनिश्चित गरेको स्थानीय तहको एकल अधिकार निर्वाध रूपमा प्रयोग गर्न पाउनुपर्ने भन्दै उनीहरूले संघीय सरकारको ध्यानाकर्षण गराएका छन् ।

संयुक्त विज्ञप्तिमा सांसद तामाङले संविधान तथा प्रचलित कानुनविपरीत निर्देशन दिएको र जिल्ला प्रशासन कार्यालयमार्फत पठाइएको पत्रले स्थानीय सरकारको अधिकार कुण्ठित गर्ने प्रयास गरेको भनिएको छ । संघीयताको मर्मविपरीत प्रशासनमार्फत अंकुश लगाउन खोजिएको भन्दै जनप्रतिनिधिले असन्तुष्टि जनाएका छन्।

यसअघि सांसद तामाङले ढुवानीका लागि बाटो प्रयोग गरेको आधारमा कर लिनु अनुचित भएको भन्दै मलेखुदेखि ताल्तीसम्म चल्ने सवारीसाधनबाट शुल्क नलिन निर्देशन दिएकी थिइन्।

त्यसका साथै कसैले कर उठाएको पाइए कारबाही गरिने चेतावनीसमेत उनले दिएकी थिइन् ।

धादिङका जनप्रतिनिधिले तीनै तहका सरकारबीच सहकार्य, समन्वय र सहअस्तित्व सुदृढ बनाउँदै अघि बढ्न आग्रह गरेका छन् । उनीहरूले स्थानीय सरकारको स्वायत्ततामाथि हस्तक्षेप नगर्न पनि चेतावनी दिएका छन्।