काठमाडौं – निर्वाचन आयोगले प्रतिनिधिसभा सदस्य निर्वाचनअन्तर्गत समानुपातिक निर्वाचन प्रणालीतर्फ निर्वाचित ११० जना सांसदलाई प्रमाणपत्र वितरण गरेको छ ।

बिहीबार काठमाडौंमा आयोजित कार्यक्रममा कार्यवाहक प्रमुख निर्वाचन आयुक्त रामप्रसाद भण्डारी, आयुक्तद्वय डा. जानकीकुमारी तुलाधर र सगुनशमशेर जबराले नवनिर्वाचित सदस्यहरूलाई स्वागत गरे। आयोगका सचिव तथा समानुपातिकतर्फका निर्वाचन अधिकृत कृष्णबहादुर राउतले प्रमाणपत्र वितरण गरे।

कार्यक्रममा कार्यवाहक प्रमुख निर्वाचन आयुक्त भण्डारीले संविधानअनुसार निर्वाचन प्रणाली सुधार गर्न नयाँ संसद् गम्भीर हुने विश्वास व्यक्त गरे।

उनले २०८४ मा हुने स्थानीय तह र प्रदेशसभा निर्वाचनलाई लक्षित गर्दै आवश्यक कानुन संशोधन गर्नुपर्ने आवश्यकता औंल्याए। साथै प्रदेशसभा र स्थानीय तहको निर्वाचन एकै समयमा गर्न सके खर्च कटौती हुने पनि उनको भनाइ थियो।

समानुपातिक निर्वाचन प्रणालीतर्फ राष्ट्रिय स्वतन्त्र पार्टी बाट ५७ जना सांसद निर्वाचित भएका छन् । त्यसैगरी नेपाली कांग्रेस बाट २०, नेपाल कम्युनिष्ट पार्टी (एमाले) बाट १६, नेपाल कम्युनिष्ट पार्टी बाट ९ तथा श्रम संस्कृति पार्टी र राष्ट्रिय प्रजातन्त्र पार्टी बाट चार–चार जना सांसद निर्वाचित भएका छन् ।

यसअघि आयोगले चैत २ गते नै समानुपातिकतर्फको नतिजा सार्वजनिक गरिसकेको थियो । प्रत्यक्षतर्फ भने राष्ट्रिय स्वतन्त्र पार्टी १२५, कांग्रेस १८, एमाले ९, नेकपा ८, श्रम संस्कृति पार्टी ३ तथा राप्रपा र स्वतन्त्र उम्मेदवार १–१ स्थानमा निर्वाचित भएका छन् ।