काठमाडौं– नेकपा एमालेका नेता सूर्यबहादुर थापा क्षत्रीले नेपाली कांग्रेसका सभापति गगनकुमार थापाको राजीनामा प्रकरणप्रति कडा टिप्पणी गरेका छन्।

बुधबार सामाजिक सञ्जालमार्फत प्रतिक्रिया दिँदै उनले सभापति थापाले उपसभापति विश्वप्रकाश शर्मा समक्ष राजीनामा दिएको भनिए पनि त्यसको औपचारिक पुष्टि नभएको बताएका छन्।

‘राजीनामा दिनेले दिएको भनेका छैनन्, बुझ्नेले हो भनेको पाइँदैन, औपचारिक पत्रसमेत सार्वजनिक छैन,’ उनले उल्लेख गरेका छन्।

थापा क्षत्रीले पार्टी प्रवक्ता, उपसभापति र सम्बन्धित पक्षहरू नै अन्योलमा देखिएको भन्दै यो प्रकरण ‘फगत स्टन्ट, फण्डा र मिडिया ट्रायल’ जस्तो मात्रै देखिएको टिप्पणी गरेका छन्।

उनले ७८ वर्ष लामो इतिहास बोकेको कांग्रेसमा यस्तो अभ्यास ‘बचकनापनको भद्दा मजाक’ भएको पनि बताएका छन्।

यदि राजीनामा वास्तविक हो भने सम्बन्धित पक्षहरूले आधिकारिक रूपमा पुष्टि गर्दै सार्वजनिक गर्ने साहस देखाउनुपर्ने उनको भनाइ छ।

यसका साथै उनले सभापतिको सचिवालय र कांग्रेस पार्टी संरचनामाथि पनि प्रश्न उठाउँदै सर्लाही–४ को चुनावी पराजयसँगै ती संरचनाहरू निष्क्रिय भएजस्तो देखिएको टिप्पणी गरेका छन्।

उनले राजीनामा दिने वा नदिने विषय व्यक्तिगत निर्णय भए पनि प्रस्तुत गरिएको शैली भने ‘मोही माग्ने ढुंग्रो लुकाउनेजस्तो’ भएको भन्दै नैतिकता, जवाफदेहिता र पारदर्शितासँगै आधिकारिकता अनिवार्य जोडिनुपर्ने बताएका छन्।