काठमाडौं- भारतको ऊर्जा उत्पादन क्षमतामा उल्लेख्य विस्तार भएको छ । आर्थिक वर्ष सन् २०२५–२६ को पहिलो १० महिनामा भारतको ऊर्जा उत्पादन क्षमता ५० हजार मेगावाटभन्दा धेरैले वृद्धि भएको छ ।

भारतको ऊर्जा मन्त्रालयका अनुसार सन् २०२५ को अप्रिलदेखि सन् २०२६ को जनवरी अन्त्यसम्म ऊर्जा उत्पादन क्षमता ५२ हजार २ सय ३७ मेगावाटले वृद्धि भएको हो । सो अवधिमा भारतको ऊर्जा उत्पादन क्षमता ११.२२ प्रतिशतले वृद्धि भएको हो ।

अघिल्लो आर्थिक वर्ष भारतको ऊर्जा उत्पादन क्षमता ३४ हजार ५४ मेगावाटले वृद्धि भएको थियो । ऊर्जा मन्त्रालयले यसलाई कुनै एक वर्षमा वृद्धि भएको हालसम्मकै सबैभन्दा धेरै ऊर्जा क्षमता भनेको छ ।

यस वृद्धिमा नवीकरणीय ऊर्जाको हिस्सा झण्डै ८० प्रतिशत रहेको मन्त्रालयले उल्लेख गरेको छ । यस अवधिमा नवीकरणीय स्रोतबाट ३९ हजार ६ सय ५७ मेगावाट थप ऊर्जा उत्पादन भएको छ ।

मन्त्रालयका अनुसार यस अवधिमा ३४ हजार ९ सय ५५ मेगावाट सौर्य ऊर्जा, ४ हजार ६ सय १३ मेगावाट वायु ऊर्जा उत्पादन थप भएको छ ।

यससँगै भारतको कुल ऊर्जा उत्पादन क्षमता ५ लाख २० हजार ५ सय १० दशमलब ९५ मेगावाट पुगेको छ ।