काठमाडौं– नेपाल कम्युनिष्ट पार्टी (एमाले) ले आफ्नो चुनावी घोषणापत्रमार्फत स्वास्थ्य स्वयंसेविकालाई प्रदान गरिँदै आएको वार्षिक भत्ता बढाएर २० हजार रुपैयाँ पुर्‍याउने घोषणा गरेको छ।

समुदायस्तरमा स्वास्थ्य सेवा विस्तार र जनचेतना अभिवृद्धिमा महत्वपूर्ण योगदान पुर्‍याउँदै आएका स्वास्थ्य स्वयंसेविकालाई थप प्रोत्साहन गर्न भत्ता वृद्धि गर्ने प्रतिबद्धता गरिएको घोषणापत्रमा उल्लेख छ । विश्व स्वास्थ्य संगठनबाट समेत सम्मानित स्वास्थ्य स्वयंसेविकाको भूमिकालाई थप सुदृढ बनाउने लक्ष्य पार्टीले राखेको छ।

त्यसैगरी, सबै स्वास्थ्य स्वयंसेविकालाई योगदानमा आधारित सामाजिक सुरक्षा प्रणालीमा आवद्ध गरिने पनि एमालेले जनाएको छ । यसबाट स्वयंसेविकाले सामाजिक सुरक्षा, आर्थिक संरक्षण तथा भविष्यमा विभिन्न सुविधा प्राप्त गर्न सक्ने अपेक्षा गरिएको छ ।

एमालेले समुदायमा प्राथमिक स्वास्थ्य सेवा सुदृढ बनाउन स्वास्थ्य स्वयंसेविकाको भूमिका अझ प्रभावकारी बनाउने नीति लिएको जनाएको छ ।