काठमाडौं– टीकापुर आन्दोलनबाट थारू समुदायको बलमा उदाएको नागरिक उन्मुक्ति पार्टीलाई नेपाली कम्युनिष्ट पार्टी (नेकपा) मा विलय गराएकी नेतृ रञ्जिता श्रेष्ठले प्रतिनिधिसभा सदस्य निर्वाचन नलड्ने भएकी छन् ।

नेकपाले २०७९ सालमा उनले जितेको कैलाली क्षेत्र नम्बर १ बाट रामलाल डगौरा थारूलाई उम्मेदवार बनाउने निर्णय गरेको छ । यससँगै मन्त्रीसमेत भइसकेकी श्रेष्ठ दोस्रो चुनावबाट पछि हटेकी हुन् ।

पति रेशम चौधरी डिल्ली बजार जेलमा हुँदा खोलिएको नाउपाबाट उठेर उनले २०७९ को आमनिर्वाचनमा कैलाली–१ बाट जितेकी थिइन् ।

तत्कालीन समयमा उनी नागरिक उन्मुक्ति पार्टी (नाउपा) का अध्यक्ष पनि थिइन् । गत पुस १४ गते रञ्जिताले नाउपालाई नेपाली कम्युनिष्ट पार्टीमा एकीकृत गराएकी हुन् ।  

राजधानीमा आयोजित कार्यक्रममा दुई पार्टीका शीर्ष नेताहरूले १० बुँदे सहमतिपत्रमा हस्ताक्षर गर्दै एकताको घोषणा गरेका थिए ।