काठमाडौं – सूचना तथा सञ्चार मन्त्रालयले भारतीय चलचित्र ‘उड्ता तीर’लाई  नेपालमा सार्वजनिक प्रदर्शन अनुमति नदिन केन्द्रीय चलचित्र जाँच समितिलाई निर्देशन दिएको छ।

मन्त्रालयले चलचित्र जाँच तथा प्रदर्शनसम्बन्धी कानुनविपरीत निर्माण भएको भन्दै उक्त चलचित्रलाई सार्वजनिक प्रदर्शन अनुमति नदिन नेशनल सिने ग्रुप नेपाल प्रालिलाई पत्राचार गरेको हो।

मन्त्रालयको श्रव्यदृश्य तथा प्रसारण शाखाले २०८३ असार ३० गते पठाएको पत्रमा चलचित्र जाँच समितिबाट असार २९ गते जाँच गरिएको ‘उड्ता तीर’ चलचित्रको निर्माण, प्रदर्शन तथा वितरण चलचित्र (निर्माण, प्रदर्शन तथा वितरण) ऐन, २०२६ को दफा ६(३) ले निषेध गरेको विषयवस्तुमा आधारित रहेको उल्लेख छ।

उक्त कानुनी व्यवस्थाअनुसार चलचित्र निर्माण भएको पाइएकाले सोही दफाबमोजिम सार्वजनिक प्रदर्शन अनुमति नदिने निर्णय भएको मन्त्रालयले जनाएको छ।

मन्त्रालयका शाखा अधिकृत विशाल भण्डारीले हस्ताक्षर गरेको पत्रमा उक्त निर्णयबारे सम्बन्धित कम्पनीलाई जानकारी गराउन अनुरोध गरिएको छ।