काठमाडौं – अर्थमन्त्री डा. स्वर्णिम वाग्ले तीनदिने भारत भ्रमण सकेर शनिबार साँझ स्वदेश फर्किएका छन् ।

भारत सरकारको निमन्त्रणामा बिहीबार ६ सदस्यीय प्रतिनिधिमण्डलको नेतृत्व गर्दै नयाँ दिल्ली पुगेका वाग्लेले भ्रमणका क्रममा भारतीय अर्थमन्त्री निर्मला सीतारमण र विदेशमन्त्री डा. एस. जयशंकरसँग भेटवार्ता गरेका थिए ।

भेटमा नेपाल–भारत आर्थिक, राजनीतिक तथा कूटनीतिक सहकार्यका विषयमा छलफल भएको वाग्लेले बताएका छन् । साथै, रसुवामा गएको भोटेकोशी बाढीपछि भारतले गरेको उद्धार तथा राहत सहयोगप्रति नेपाल सरकारका तर्फबाट धन्यवाद दिँदै पुनर्निर्माणमा थप सहयोगको प्रस्ताव गरिएको उनले बताए ।

भ्रमणका क्रममा वाग्ले विभिन्न आर्थिक–व्यावसायिक तथा प्राज्ञिक कार्यक्रममा समेत सहभागी भएका थिए। भारतीय उद्योग परिसङ्घको सम्मेलन र दिल्ली स्कुल अफ इकोनोमिक्सको विकास अर्थनीतिसम्बन्धी छलफलमा उनी प्रमुख वक्ता तथा अतिथिका रूपमा सहभागी भएका थिए ।