इनरुवा – सुनसरीको देवानगञ्ज गाउँपालिका–१ मध्येहर्षाहीस्थित बीपी चोकमा भएको झडपको घटनालाई लिएर सामाजिक सञ्जाल तथा सञ्चारमाध्यममा भ्रमपूर्ण विवरण सम्प्रेषण भएको भन्दै प्रहरीले यथार्थ बुझेर मात्र समाचार सम्प्रेषण गर्न आग्रह गरेको छ ।

जिल्ला प्रहरी कार्यालय सुनसरीले शुक्रबार जारी गरेको प्रेस विज्ञप्तिमा घटनामा गोली प्रहारबाट मानिसको मृत्यु तथा घाइते भएको भन्ने विवरण सामाजिक सञ्जाल तथा सञ्चारमाध्यममा प्रसारित भएको उल्लेख गर्दै त्यस्तो विवरण भ्रमपूर्ण रहेको जनाएको छ ।

प्रहरीका अनुसार शुक्रबार साँझ करिब ५ः२५ बजे दुई यादव समूहबीच झडप भएको थियो। झडपमा देवानगञ्ज–१ का २४ वर्षीय निरकुमार यादव घाइते भएका छन् । उनको पुठ्ठामा चोट लागेको र विराटनगरस्थित नोबेल अस्पतालमा उपचार भइरहेको प्रहरीले जनाएको छ । घाइतेको स्वास्थ्य अवस्था मध्यम रहेको छ ।

घटनामा संलग्न रहेको आरोपमा देवानगञ्ज–२ का १८ वर्षीय विष्णुकुमार यादव र सोही ठाउँका २६ वर्षीय ‘लाली’ भन्ने जयकृष्ण यादवलाई प्रहरीले नियन्त्रणमा लिएको छ। उनीहरूमाथि थप अनुसन्धान भइरहेको प्रहरीले जनाएको छ ।

घटनामा संलग्न अन्य व्यक्तिहरूको खोजी कार्यसमेत जारी रहेको प्रहरीले जनाएको छ ।

प्रहरीले घटनाबारे आधिकारिक विवरण नबुझी सामाजिक सञ्जालमा आएका सूचनाका आधारमा समाचार सम्प्रेषण नगर्न सञ्चारमाध्यमलाई आग्रह गरेको छ। घटनाको यथार्थ बुझेर तथ्यपरक समाचार सम्प्रेषण गर्न प्रहरीले अनुरोध गरेको हो ।