विराटनगर – सुनसरीको देवानगन्ज गाउँपालिका–१ मा गोली प्रहारबाट एक युवक घाइते भएका छन् ।

शनिबार साँझ लक्ष्मीनारायण मन्दिर अगाडि भएको घटनामा स्थानीय २३ वर्षीय निरजकुमार यादव घाइते भएका हुन् ।

यादवको शरीरको पछाडिपट्टि कम्मरमुनिको भागमा चोट लागेको बताइएको छ । घटनापछि उनलाई उपचारका लागि विराटनगरस्थित नोबेल अस्पताल ल्याइएको हो । उनको उपचार भइरहेको गाउँपालिका अध्यक्ष वेचन मेहताले जानकारी दिएका छन् ।

जिल्ला प्रहरी कार्यालय सुनसरीका प्रवक्ता डीएसपी चन्द्र खड्काले घटनाको पुष्टि गर्दै घटनाबारे थप विवरण संकलन भइरहेको बताए ।

उनका अनुसार युवकलाई गोली लागेको भनिए पनि गोली प्रहार नै भएको हो वा अन्य कुनै हतियार प्रयोग भएको हो भन्ने विषयमा प्रहरीले यकिन गरिसकेको छैन ।

घटनापछि प्रहरीले घटनास्थलमा सुरक्षा टोली परिचालन गरेको छ । डीएसपी खड्का पनि घटनास्थलतर्फ गएको प्रहरीले जनाएको छ ।

घटनामा संलग्न रहेको आरोपमा प्रहरीले दुई जनालाई नियन्त्रणमा लिएको छ । पक्राउ परेका व्यक्तिको पहिचान भने प्रहरीले सार्वजनिक गरेको छैन ।

स्थानीय प्रत्यक्षदर्शीका अनुसार घटनामा संलग्न रहेको आशंका गरिएका केही व्यक्ति घटनापछि फरार भएका छन् ।

घटनाको कारण तथा आक्रमणमा प्रयोग भएको भनिएको हतियारबारे प्रहरीले अनुसन्धान अघि बढाएको जनाएको छ । प्रहरीले घटनाको थप विवरण अनुसन्धानपछि सार्वजनिक गर्ने तयारी गरेको छ ।