इनरुवा- संविधान दिवस तथा राष्ट्रिय दिवसका अवसरमा शनिबार सुनसरीको सदरमुकाम इनरुवामा प्रभातफेरी निकालिएको छ।

जिल्ला समन्वय समिति सुनसरीको संयोजनमा आयोजित प्रभातफेरीमा नगर क्षेत्रका विभिन्न विद्यालयका विद्यार्थी, सुरक्षाकर्मी, सरकारी कार्यालयका कर्मचारी तथा जनप्रतिनिधिको सहभागिता रहेको थियो।

जिल्ला समन्वय समिति परिसरबाट सुरु भएको प्रभातफेरी इनरुवाको मुख्य बजार हुँदै पञ्चवटी पार्कमा पुगेर कोणसभामा परिणत भएको थियो।

कार्यक्रमको समापनका अवसरमा जिल्ला समन्वय समिति सुनसरीका अध्यक्ष राजन मेहताले झण्डोत्तोलन गरेका थिए। सो अवसरमा अध्यक्ष मेहता र प्रमुख जिल्ला अधिकारी ईश्वरीप्रसाद अर्यालले सम्बोधन गरेका थिए।

संविधान दिवसकै अवसरमा इनरुवामा रक्तदान कार्यक्रमसमेत आयोजना गरिएको थियो।