काठमाडौं – राष्ट्रिय स्वतन्त्र पार्टी (रास्वपा)की सांसद आशिका तामाङले अबदेखि भद्र, मर्यादित र अनुशासित भएर प्रस्तुत हुने प्रयास गर्ने बताएकी छन् ।

रास्वपा संसदीय दलको अनौपचारिक बैठकमा सभापति रवि लामिछानेले सांसदहरूलाई संसदमा मर्यादित भएर प्रस्तुत हुन निर्देशन दिएपछि तामाङले सामाजिक सञ्जालमार्फत यस्तो प्रतिक्रिया दिएकी हुन् ।

उनले लेखेकी छन्, ‘अबदेखि भद्र, झट्ट नरिसाउने, मर्यादामा बस्ने र अनुशासन पालन गर्ने आशिका बन्ने कोसिस गर्नेछु।’

बैठकमा लामिछानेले सांसद तामाङ र खगेन्द्र सुनारलाई संसदमा प्रस्तुत हुने शैलीलाई लिएर सचेत गराएको बताइएको छ । तामाङले यसअघि आफ्नो निर्वाचन क्षेत्रका एक युवाको शव नेपाल ल्याउन सरकारले सहयोग नगरेको भन्दै संसदमा आक्रोश व्यक्त गरेकी थिइन् ।

लामिछानेले सांसदहरूले अभियन्ताको शैलीभन्दा फरक ढंगले संसदीय मर्यादाभित्र रहेर आफ्ना कुरा राख्नुपर्ने बताएका थिए ।