लन्डन- रूसमा हालै भएका युक्रेनी ड्रोन आक्रमणमा बेलायतमा निर्मित ड्रोन प्रयोग भएको पुष्टि भएपछि रूसले दिएको चेतावनीका बाबजुद बेलायतले युक्रेनलाई निरन्तर समर्थन गर्ने प्रतिबद्धता जनाएको छ ।

बेलायती प्रधानमन्त्री एन्डी बर्नह्यामले विज्ञप्ति जारी गर्दै आवश्यक परेको समयमा बेलायत युक्रेनको साथमा सधैँ रहने बताएका हुन् ।

युक्रेनलाई निरन्तर सैन्य सहयोग उपलब्ध गराउँदा रूसबाट उत्पन्न हुन सक्ने जोखिमबारे सोधिएको प्रश्नमा प्रधानमन्त्री बर्नह्यामले युक्रेनलाई आत्मरक्षाका लागि आवश्यक सहयोग उपलब्ध गराउँदै आएको र आगामी दिनमा पनि समर्थन जारी राख्ने स्पष्ट पारे।

यसैबीच, लन्डनस्थित रूसी दूतावासले बेलायतले जानाजानी युक्रेन संकटलाई थप चर्काउने नीति अपनाएको आरोप लगाएको छ । युक्रेनलाई सैन्य सहयोगमार्फत द्वन्द्वमा बेलायतको संलग्नता जारी रहे त्यसको ‘उच्च मूल्य’ चुकाउनुपर्ने चेतावनीसमेत दूतावासले दिएको छ ।

रूसी दूतावासले बेलायतले आफ्नो नीतिको परिणाम भोग्नुपर्ने चेतावनी दिएको छ ।

पछिल्लो समय युक्रेनले मस्कोसहित रूसका विभिन्न क्षेत्रमा लामो दूरीका ड्रोन आक्रमण तीव्र बनाउँदै आएको छ । युक्रेनी आक्रमणमा रूसी तेल प्रशोधन केन्द्र तथा रूसको प्रमुख अनलाइन खुद्रा विक्रेता वाइल्डबेरीजसँग सम्बन्धित गोदामसमेत निशाना बनेका छन् ।

रूस–युक्रेन युद्धका क्रममा दुवै पक्षबीच लामो दूरीका ड्रोन आक्रमण बढिरहेका बेला बेलायतको पछिल्लो प्रतिबद्धताले दुई देशबीचको तनाव थप बढ्ने संकेत देखिएको छ ।