काठमाडौं- राष्ट्रिय स्वतन्त्र पार्टीका सभापति रवि लामिछानेले तत्कालै वालेन्द्र शाह नेतृत्वको सरकारका मन्त्री हेरफेर नगर्ने स्पष्टीकरण दिएका छन्।

बुधबार बालेनबिनै बसेको संसदीय दलको बैठकपछि पत्रकारहरूले सोधेको प्रश्नमा अहिले मन्त्री हेरफेर गर्ने निष्कर्ष आफूहरू नपुगेको बताएका छन्।

‘तत्काल कुनै मन्त्री फेरबदल हुँदैनन्। १०० वटा काममा दुई तीनवटामा प्रश्न उठ्यो होला तर त्यसो भन्दैमा परिवर्तन गर्ने पक्षमा पुगेका छैनौं’, लामिछानेले भने, ‘संसदीय अभ्यासलाई व्यवस्थित मर्यादित र मन्त्रीसँगै सांसदहरूको समन्वय राम्रो होस् भन्ने हेतुले यो बैठक गरिएको हो।’

लामिछानेले रास्वपा पदाधिकारी र केन्द्रीय सदस्य मनोनीत गर्ने विषयमा पनि मुख खोलेका छन्। उनले पार्टी विधानमा पाँच वर्षसम्म गरिसक्नुपर्ने व्यवस्था रहेकाले त्यही व्यवस्था अनुसार अगाडि बढ्ने उल्लेख गरे ।

सभापति लामिछानेले सञ्चारमाध्यमले लेखेरै प्रधानमन्त्री र आफूबीचको सम्बन्ध अझ गाढा भएकाले लेखिरहन आग्रह गरेका छन्।

‘तपाईंहरूले कहिलेकाहीँ लेख्नुहुन्छ, म र प्रधानमन्त्रीबीच दूरी बढेको छ भनेर यो तपाईंहरूले लेखेका कारण अझै हामी निकटता भएका छौँ’, उनले भने, ‘लेख्न नछोड्नुहोला ।’

प्रधानमन्त्रीले एक्लै भएँ भनेर लेखेको फेसबुक स्टाटसको पनि जवाफ दिए । भने, ‘प्रधानमन्त्री साहित्यकार र गीतकार पनि हो नि, त्यसकारण सबै कुरा राजनीति हिसाबले नबुझिदिनुहोला ।’