काठमाडौं– नेपाल स्टक एक्सचेन्ज (नेप्से) ले बानेश्वरमा कार्यालय रहेको बेनी सेक्युरिटिज प्रालिलाई धितोपत्र कारोबार गर्नबाट निलम्बन गरेको छ । 

शेयर कारोबारको राफसाफ तथा फछ्र्यौट कार्य तोकिएको समयभित्र नगरेको पाइएपछि नेप्सेले उक्त ब्रोकर कम्पनीलाई कारबाही स्वरूप निलम्बन गरेको हो ।

सिडिएस एण्ड क्लियरिङ्ग लिमिटेडले मिति २०८३/०५/०३ मा नेप्सेलाई पत्र लेख्दै बेनी सेक्युरिटिजले राफसाफको काम पुरा नगरेकाले निलम्बन गर्न सिफारिस गरेको थियो । सोही सिफारिसका आधारमा नेप्सेले धितोपत्र कारोबार सञ्चालन विनियमावली, २०७५ को विनियम २२(१) (छ) को व्यवस्था बमोजिम ३ (तीन) कार्य दिनका लागि कारोबार रोक्का गर्ने निर्णय गरेको हो ।

नेप्सेले यस निर्णयको जानकारी नेपाल धितोपत्र बोर्ड (सेबोन), सिडिएस एण्ड क्लियरिङ्ग लिमिटेड र सम्बन्धित अन्य शाखाहरूलाई समेत गराएको छ ।