काठमाडौं– पूर्वाधार विकास मन्त्रालयले चालु आर्थिक वर्षमा करिब १० खर्ब रुपैयाँ बराबरको टेन्डर खुलाउने तयारी गरेको छ।

बिहीबार प्रतिनिधिसभामा विनियोजन विधेयकमाथि मन्त्रालयगत छलफलका क्रममा जवाफ दिँदै पूर्वाधार विकास मन्त्री सुनिल लम्सालले बहुवर्षीय ठेक्का प्रणालीमार्फत ठूलो परिमाणमा टेन्डर अघि बढाइने जानकारी दिएका हुन्।

मन्त्री लम्सालका अनुसार मन्त्रालयको वार्षिक बजेट २ खर्ब ८६ अर्ब रुपैयाँ भए पनि तीन वर्षका लागि काम समेटिने गरी एकैटक ठेक्का प्रक्रिया अघि बढाउने योजना छ। उनले मूल्यवृद्धिका आधारमा लागत समायोजन हुने व्यवस्था पनि लागू गरिने बताए।

उनका अनुसार चालु आर्थिक वर्षको पहिलो ६ महिना टेन्डर आह्वान प्रक्रियामै खर्च हुने भएकाले प्रारम्भिक बजेट कम देखिने भए पनि दीर्घकालीन ठेक्का प्रणालीले काम छिटो अघि बढाउने अपेक्षा गरिएको छ।

‘तीन वर्षको ठेक्का एकैपटक लगाउँदा समय प्रक्रिया छोटिनेछ,’ मन्त्री लम्सालले भने, ‘हाल २० देखि २२ महिना लाग्ने काम ६ देखि ७ महिनामा झार्ने लक्ष्य छ।’

सरकारले यस कदमले पूर्वाधार परियोजनाको कार्यान्वयन गति बढ्ने र ढिलाइ कम हुने अपेक्षा गरेको छ।