चितवन – नारायणगढ–मुग्लिन सडकखण्डको तुइन खोला नजिकै सुख्खा पहिरो खस्दा प्रभावित बनेको यातायात सेवालाई पूर्ण रूपमा सुचारु गराउन बिहीबार बिहानैदेखि मेसिन परिचालन गरिएको छ । हिजो (बुधबार) राति ८:३० बजेतिर अचानक सुख्खा पहिरो खसेर सडक पूर्ण रूपमा अवरुद्ध भएको थियो ।

सडक डिभिजन कार्यालय भरतपुर र सुरक्षाकर्मीको टोली तत्काल खटिएर करिब डेढ घण्टाको प्रयासपछि राति १० बजेदेखि सडक आंशिक रूपमा सञ्चालनमा ल्याइएको थियो ।

सडक डिभिजन भरतपुरका सडक सुपरभाइजर ईश्वर क्षेत्रीका अनुसार, राति एकतर्फी रूपमा गाडी सञ्चालन गरिए पनि बाँकी रहेको पहिरो हटाएर सडकलाई सुरक्षित र दुईतर्फी बनाउन अहिले तीव्र गतिमा काम भइरहेको छ । पहिरो पन्छाउने क्रममा गाडीको आवतजावत सुरक्षित राख्न सुरक्षाकर्मीको समन्वयमा केही समयका लागि सवारी साधनलाई रोक्दै, खुलाउँदै मेसिन प्रयोग गरी पहिरो हटाइएको सडक डिभिजनले जनाएको छ ।

काठमाडौँ र पोखरालाई चितवनसँग जोड्ने यो व्यस्त सडकखण्डमा पहिरोका कारण राति केही समय सवारीको लामो लाइन लागे पनि अहिले यातायातलाई सहज बनाउने प्रयास जारी छ ।