तेहरान– युद्धको सन्त्रासबीच इरानले फेरि एक पटक सहमतिका लागि १४ बुँदे नयाँ प्रस्ताव अमेरिकालाई पठाएको छ।

इरानी मिडिया रिपोर्टहरूका अनुसार इरानले पाकिस्तानमार्फत् आफ्नो नयाँ १४ सूत्रीय प्रस्ताव अमेरिकालाई पठाएको हो। यो प्रस्ताव शान्ति प्रक्रिया र युद्ध अन्त्यसँग सम्बन्धित रहेको बताइएको छ।

तस्नीम न्यूज एजेन्सीले एक स्रोतलाई उद्धृत गर्दै बताएअनुसार तेहरानको मुख्य फोकस युद्ध अन्त्य गर्नु र दुवै पक्षबीच विश्वास कायम गर्नु रहेको छ।

यसबीच पाकिस्तानका गृह मन्त्री मोहसिन नकवीले तेहरानमा आफ्नो भ्रमण तेस्रो दिनसम्म बढाएका छन्। उनी हालैका दिनमा इरान र अमेरिकाबीचको वार्ता अघि बढाउने प्रयासमा संलग्न रहेका छन्।

अमेरिका भन्छ- इरानको फन्डिङ रोक्नुपर्छ

अमेरिकाका वित्त मन्त्री स्कट बेसेण्टले जी७ देशका वित्त मन्त्रीहरूसँग इरानमाथि लगाइएका प्रतिबन्धहरू पालना गर्न अपिल गर्ने बताएका छन्।

स्कट बेसेण्टले यी प्रतिबन्धहरूको मुख्य उद्देश्य इरानको फन्डिङ रोक्नु रहेको बताएका छन्। अमेरिकाले सबै ठूला देशहरू मिलेर इरानमाथि आर्थिक दबाब कायम राख्न चाहेको पनि उनले बताए ।