काठमाडौं- परराष्ट्रमन्त्री शिशिर खनालले इरानमा पक्राउ परेका नेपाली नागरिक अमृत झाको रिहाइसम्बन्धी सार्वजनिक गरिएको सूचना गलत भएको स्वीकारेका छन्। उनले यस प्रकरणमा सामाजिक सञ्जालमै लेखेर क्षमायाचना गरेका छन् ।

मन्त्री खनालले सामाजिक सञ्जाल फेसबुकमार्फत इरानको क्वेशम द्वीपमा अवैध सामान तस्करी तथा ओसारपसारको आरोपमा पक्राउ परेका झा हाल पनि बन्दर अब्बासस्थित कारागारमा पुर्पक्षका लागि थुनामा रहेको जानकारी दिएका हुन् ।

उनका अनुसार जनवरी २०२६ को सुरुमा, अमेरिका–इजरायल र इरानबीच २८ फेब्रुअरीमा द्वन्द्व सुरु हुनुअघि नै अमृत झा र अन्य ६ विदेशी नागरिकलाई इरानी सुरक्षाकर्मीले नियन्त्रणमा लिएका थिए ।

मन्त्री खनालले १५ अप्रिल २०२६ मा इरानका लागि नेपाली अनररी कन्सल शाहराम शान्तियले कतारस्थित नेपाली कार्यवाहक राजदूत कुमार राईलाई अमृत झा रिहा भएको जानकारी पठाएको बताएका छन् ।

त्यही सूचनाका आधारमा परराष्ट्र मन्त्रालयले झा रिहा भएको अनौपचारिक जानकारी सार्वजनिक गरेको खनालले बताएका छन् । आफूले पनि सामाजिक सञ्जालमार्फत उक्त विषय सार्वजनिक गरेको उनले स्वीकारेका छन् ।

तर केही दिनपछि प्राप्त नयाँ जानकारीअनुसार अमृत झा रिहा नभएको र सम्बन्धित मुद्दामा अदालतले ‘एक्स्पर्ट रिपोर्ट’ तयार गर्न आदेश दिएको खुलेको मन्त्री खनालले बताएका छन् ।

त्यसपछि मन्त्रालयका अधिकारीहरूले झाका परिवारलाई वास्तविक अवस्था जानकारी गराइसकेको उनले जनाएका छन् ।

इरानको स्थानीय अदालतमा मुद्दा विचाराधीन रहेको अवस्थामा रिहा भएको अनौपचारिक सूचना सार्वजनिक हुँदा उत्पन्न अन्योल र असुविधाप्रति आफू क्षमाप्रार्थी रहेको मन्त्री खनालले उल्लेख गरेका छन् ।

परराष्ट्र मन्त्रालयका अनुसार हाल विज्ञ टोलीले ‘एक्स्पर्ट रिपोर्ट’ तयार गरी अदालतमा बुझाउने प्रक्रियामा रहेको छ । मन्त्रालयले अमृत झाको निष्पक्ष सुनुवाइ र कानुनी सहजीकरणका लागि कूटनीतिक पहल जारी राखेको जनाएको छ ।