काठमाडौं- हर्कराज राई नेतृत्वको प्रतिपक्षी दल श्रम संस्कृति पार्टीले प्रतिनिधिसभा बैठकभित्रै प्रदर्शन गरेको छ ।

प्रधानमन्त्री वालेन्द्र शाह संसद्प्रति जवाफदेही हुनुपर्ने भन्दै श्रम संस्कृति पार्टीका सांसदहरूले पर्चा देखाएर बैठकमा विरोध प्रदर्शन गरेका हुन् ।

उनीहरूले प्रधानमन्त्री संसद्प्रति जवाफदेही बन्नै पर्छ, प्रश्नदेखि भाग्न पाइँदैन, जनमतलाई सम्मान गर, संसद् छलेर अध्यादेश ल्याउन बन्द गर, संसदीय जिम्मेवारी बहन गर लेखिएका पर्चा देखाए ।

सदनभित्रै श्रम संस्कृति पार्टीका सांसदहरूले पर्चा देखाएपछि सभामुख डोलप्रसाद अर्यालले आपत्ति प्रकट गरेका छन् ।

विरोधका आफ्नै शैली हुने भन्दै उनले सदनको मर्यादाबाहिर रहेर विरोध गर्ने काम बन्द गर्न उनले निर्देशन दिए । उनले सदनमा पर्चा देखाउने अभ्यास नरहेको स्मरणसमेत श्रम संस्कृतिका सांसदहरूलाई गराए ।