काठमाडौँ – आईसीसी विश्वकप लिग–२ मा नेपालका लागि सन्दीप लामिछानेले सबैभन्दा बढी विकेट लिँदा अलराउन्डर दीपेन्द्रसिंह ऐरीले सबैभन्दा धेरै रन बनाएका छन् ।

२०२३ देखि सुरु भएर २०२७ मा सकिने यो लिगमा नेपालले अहिलेसम्म २६ वटा खेल खेलिसकेको छ । २६ मध्ये २१ खेलका २० इनिङस् खेलेका सन्दीप लामिछानेले ३६ विकेट हात पारेका छन् । लिग–२ मा सहभागी आठ टिममध्ये उनी सर्वाधिक विकेट कर्ताको सूचीको सातौं नम्बरमा छन् । ३६ विकेट हात पार्दा सन्दीपले १२ मेडन राख्दै ८६५ रन खर्चिएका छन् । कुल १९४ ओभर ५ बलको सामना गरेका उनको इकोनमी चार दशमलव ४३ रहेको छ ।

नेपालका लागि सोमपाल कामीले १९ खेल खेल्दै २८ विकेट लिएका छन् भने २१ खेल खेलेका करण केसीले २४ विकेट हात पारेका छन् ।

नेपालका लागि सर्वाधिक रनकर्ता दीपेन्द्रसिंह ऐरी
नेपालले २६ खेल खेल्दा सर्वाधिक रन बनाउने नेपाली खेलाडीको सूचीमा दीपेन्द्र अगाडि छन् । २२ खेलको प्लेइङ ११ मा परेका दीपेन्द्रले १८ इनिङ खेल्दा ६७५ रन बनाएका छन् । एक खेलमा शतक पूरा गरेका उनले पाँच खेलमा अर्धशतक बनाएका छन् । १८ खेलमा उनले ४७ चौका प्रहार गर्दा १० वटा छक्का हिर्काएका छन् । उनको एभरेज ३९ दशमल ७० रन रहेको छ ।

सर्वाधिक रनकर्ता खेलाडीको नेपाली सूचीको दोस्रो स्थानमा ओपनर आशिफ शेख छन् । उनले २३ खेलमा ६०८ रन बनाएका छन् भने तेस्रो स्थानमा रहेका उनका दाइ आरिफ शेखले २१ खेल खेल्दै ५४९ रन बनाएका छन् । चौथो स्थानमा रहेका नेपाली कप्तान रोहितकुमार पौडेलले २५ खेल खेल्दा ५२३ रन बनाएका छन् । पाँचौ स्थानमा रहेका अर्का ओपनर कुशल भुर्तेलले २० खेल खेल्दै ४९२ रन बनाएका छन् ।

नेपालले २७ औँ खेलमा आज स्कटल्यान्डसँग प्रतिस्पर्धा गर्दैछ । यो खेल कीर्तिपुरस्थित त्रिवि क्रिकेट मैदानमा हुनेछ । अघिल्लो खेलमा स्कटल्यान्डसँग डिएल पद्धतिबाट निर्णय हुँदा दुई रनको पराजय भोगेको नेपाल आज बदला लिने लक्ष्यका साथ मैदानमा हुनेछ ।