काठमाडौं– सर्वोच्च अदालतका कर्मचारीले नै कार्यालयका आन्तरिक नियम पालना नगरेको पाइएको छ ।

अदालतको अनुगमन महाशाखाले वैशाख ३ गते गरेको आकस्मिक हाजिर तथा ‘ड्रेसकोड’ अनुगमनका क्रममा यस्तो अवस्था देखिएको अदालत प्रशासनले जनाएको छ ।

अनुगमनका क्रममा बिहान ९ः०० बजेपछि कार्यालय प्रवेश गर्ने कर्मचारीको संख्या ८२ जना रहेको पाइएको छ भने २२ जना कर्मचारी तोकिएको पोसाकविपरीत (जिन्स, टिसर्ट लगायत) उपस्थित भएको भेटिएको छ ।

त्यस्तै, बिदा स्वीकृत वा पूर्वजानकारीबिना अनुपस्थित रहने कर्मचारीको संख्या ७० जना रहेको प्रशासनले जनाएको छ । वैशाख २ गते गरिएको ‘कुर्सी छड्के’ अनुगमनमा समेत नौ जना कर्मचारी (बिहान–बेलुका हाजिर मात्र गर्ने) आफ्नो कार्यकक्षमा अनुपस्थित भेटिएका थिए ।

अदालत प्रशासनले जारी गरेको सूचनामा कर्मचारीलाई तोकिएको समयमा कार्यालय उपस्थित हुन, निर्धारित पोसाकमै अदालत प्रवेश गर्न तथा शाखा प्रमुख वा महाशाखा प्रमुखको निर्देशनमा सेवाग्राहीमैत्री ढंगले कार्यसम्पादन गर्न निर्देशन दिएको छ ।

साथै, अनुगमनबाट देखिएका कैफियतको अभिलेख राखिने जनाउँदै अदालतले अबदेखि बिहान ९ः१५ पछि र बेलुका ५ः०० अघि हाजिरी मेसिनले हाजिर नलिने व्यवस्था गरिएको जानकारी दिएको छ ।

अदालतले अनुगमन महाशाखाबाट यस्ता छड्के अनुगमन निरन्तर रूपमा जारी रहने समेत जनाएको छ ।