काठमाडौं– संघीय मामिला तथा सामान्य प्रशासन मन्त्रालयले गाउँपालिका, नगरपालिका तथा वडाको संख्या र सीमाना हेरफेरका लागि सरोकारवाला निकायसँग सुझाव माग गरेको छ ।

मन्त्रालयले सबै जिल्ला समन्वय समिति, स्थानीय तह तथा सम्बन्धित निकायलाई पत्राचार गर्दै राय र सुझाव उपलब्ध गराउन अनुरोध गरेको हो । स्थानीय सरकार सञ्चालन ऐन, २०७४ का विभिन्न प्रावधानअनुसार स्थानीय तहको सिमाना हेरफेर, मर्जर तथा नगरपालिकाको वर्गीकरण पुनरावलोकन गर्ने उद्देश्यले प्रारम्भिक मस्यौदा तयार गरिएको मन्त्रालयले जनाएको छ ।

उक्त मस्यौदालाई अन्तिम रूप दिन जिल्ला समन्वय समिति महासंघ, नेपाल नगरपालिका संघ र गाउँपालिका राष्ट्रिय महासंघलाई समेत सहजीकरणका लागि बोधार्थ पठाइएको छ ।

मन्त्रालयका अनुसार ऐनको दफा ३, ५, ६, ७ र ८ अनुसार गाउँपालिका तथा नगरपालिकाको सिमाना हेरफेर, दुई वा बढी स्थानीय तह गाभ्ने तथा वडाको संख्या समायोजन गर्ने विषय समेटिएको छ ।

यस सम्बन्धमा कुनै पनि राय वा सुझाव भए तीन दिनभित्र मन्त्रालयको आधिकारिक इमेलमा पठाउन सरोकारवालालाई आग्रह गरिएको छ ।