काठमाडौं– कान्तिपुर सिटी कलेज (केसीसी) पूर्वविद्यार्थी समाजले शनिबार बिहान सम्मान तथा बधाई कार्यक्रम आयोजना गरेको छ।

राष्ट्रिय नीति निर्माण र शासन व्यवस्थामा योगदान पुर्‍याइरहेका आफ्ना पूर्वविद्यार्थी तथा पूर्वशिक्षकहरूलाई कलेजले सम्मान गरेको हो ।

सम्मानित हुनेहरूमा सांसद प्रकाशचन्द्र परियार, दोलखाका सांसद जगदीश खरेल, पूर्वशिक्षकसमेत रहेका सांसद निश्कल राई, राष्ट्रिय सूचना आयोगका प्रमुख सूचना आयुक्त डा. सुरेश प्रसाद आचार्य, प्रधानमन्त्रीका प्रेस विज्ञ दीपा दाहाल र प्रधानमन्त्री कार्यालयका अफिसियल फोटोग्राफर विनय शाक्य छन्।

कार्यक्रममा सम्मानित व्यक्तित्वहरूले केसीसीले दिएको गुणस्तरीय शिक्षा र नेतृत्व विकासले आफूहरूको सफलतामा महत्वपूर्ण भूमिका खेलेको उल्लेख गर्दै कलेजप्रति कृतज्ञता व्यक्त गरेका थिए।

कलेजका अध्यक्ष डा. प्रह्लाद कार्की र प्रिन्सिपल राजु कट्टेलले सम्मानित व्यक्तित्वहरूलाई बधाई दिँदै केसीसीले गुणस्तरीय तथा अनुसन्धानमुखी शिक्षामा निरन्तर प्रतिबद्ध रहने बताएका छन्।

केसीसीबाट काठमाडौं महानगरपालिकाका मेयर बालेन्द्र शाहले पनि दुई सेमेस्टर अध्ययन गरेका थिए। कलेजले राष्ट्र निर्माण र नीति निर्माण तहमा योगदान गर्ने नेतृत्व उत्पादन गर्दै आएको बताइएको छ।