काठमाडौं- पाकिस्तानको बलुचिस्तानका विभिन्न जिल्लाबाट आठ जनालाई बेपत्ता पारिएको छ । स्थानीय स्रोतका अनुसार उनीहरूलाई पाकिस्तानी सुरक्षा बलले नियन्त्रणमा लिएको हो ।

यी घटनाहरू क्वेटा, ग्वादर, खुज्दार र केच लगायतका क्षेत्रमा भएका हुन् । गत मार्च १२ मा क्वेटाबाट २१ वर्षीय मेकानिक सैफुल्लाहलाई सुरक्षाकर्मीले नियन्त्रणमा लिएका थिए ।

मार्च १३ मा ग्वादरको जिवानीबाट २० वर्षीय मजिदलाई पनि हिरासतमा लिइएको परिवारको दाबी छ । यसैगरी खुज्दार जिल्लाका दुई दाजुभाइ शम्स बलुच र कमर जेहरीलाई पनि छुट्टाछुट्टै मितिमा बेपत्ता पारिएको छ ।

केच जिल्लाको तुर्बत क्षेत्रबाट बलाच पिरल र बलाच नसिरलाई रातीको समयमा अज्ञात स्थलतर्फ लगिएको छ । खरान सहरमा भने अब्दुल घानीलाई प्रहरी चौकी नजिकैबाट अज्ञात सशस्त्र समूहले अपहरण गरेको प्रत्यक्षदर्शीले बताएका छन् ।

बेपत्ता भएका व्यक्तिका परिवारले अहिलेसम्म आफ्ना आफन्तको अवस्था अज्ञात रहेको जनाएका छन् । उनीहरूलाई कुनै पनि अदालतमा उपस्थित गराइएको छैन ।