काठमाडौं- मानव अधिकार संगठन पाङ्कले फेब्रुअरी २०२६ को मासिक प्रतिवेदन सार्वजनिक गरेको छ । यस प्रतिवेदनमा पाकिस्तानको बलुचिस्तान र आसपासका क्षेत्रमा भएका गम्भीर मानव अधिकार उल्लंघनका घटनाहरू उजागर गरिएको छ ।

प्रतिवेदनका अनुसार यस महिनामा पनि व्यक्ति बेपत्ता पार्ने, गैरन्यायिक हत्या र यातनाका घटनाहरू जारी छन् । प्रतिवेदनका अनुसार फेब्रुअरी महिनामा मात्रै १०९ जनालाई जबर्जस्ती बेपत्ता पारिएको छ ।

संगठनले यस्ता घटनाहरू बलुचिस्तान बाहिरका कराँची र डेरा गाजी खानमा पनि देखिएको जनाएको छ । नुस्की, हुब, क्वेटा, ग्वादर र पन्जगुर जस्ता जिल्लाहरूमा धेरै व्यक्ति पक्राउ परेका र बेपत्ता भएका छन् ।

पहिले हिरासतमा लिइएका ४१ जना व्यक्तिहरू भने पछि रिहा भएका छन् । तर, ती व्यक्तिहरूले हिरासतमा रहँदा गम्भीर मानसिक र शारीरिक यातना भोगेको बताइएको छ ।

प्रतिवेदनले फेब्रुअरीमा ५० वटा गैरन्यायिक हत्याका घटनाहरू पनि दर्ता गरेको छ। पाकिस्तानी सुरक्षा बलले कानुनी प्रक्रिया बिना नै मानिसहरूलाई हिरासतमा लिने र मार्ने गरेको आरोप संगठनले लगाएको छ ।