काठमाडौं- नेकपा एमालेका केन्द्रीय सदस्य गोकुलप्रसाद बास्कोटाले राष्ट्रिय स्वतन्त्र पार्टी नेतृत्वको नयाँ सरकारलाई काम गर्न समय दिनुपर्ने बताएका छन्।

बुधबार सामाजिक सञ्जाल फेसबुकमार्फत प्रतिक्रिया दिँदै उनले राष्ट्रिय स्वतन्त्र पार्टी (रास्वपा) ले झन्डै दुईतिहाइ बहुमतसहित चुनाव जितेपछि सरकार कसरी चलाउने भन्ने जिम्मेवारी उनीहरूकै भएको उल्लेख गरेका छन्।

बास्कोटाले नयाँ सरकारले काम थालेको कम्तीमा तीन महिनासम्म अन्य पक्षबाट टिप्पणी गर्नु उपयुक्त नहुने बताएका छन्।

उनले जनता सधैँ साझा रहने उल्लेख गर्दै यसपटक भने रास्वपालाई रोजेको बताए । यसरी मतदाताले रास्वपाको वाचा पत्याएको टिप्पणी गर्दै उनले अब सरकारलाई काम गर्न दिनुपर्ने बताएका छन्।

उनले अनावश्यक आलोचना र खिचातानी नगर्न आग्रह गर्दै सरकारलाई काम गर्ने वातावरण बनाउनुपर्नेमा जोड दिएका छन्।

‘रास्वपाले चुनाव जित्यो । चलाउँछन कसरी ? त्यो उनीहरूकै कुरा हो। नयाँ सरकारले काम थालेको तीन महिनासम्म अरुले केही बोल्नु नै बेकार हो’, उनी भन्छन्, ‘जनता साझा थिए, छन र हुने नै छन्। फरक कति मात्र हो भने आमजनताको रोजाइमा यसपल्ट उनीहरू परे, अझै यसो भनौँ, उनीहरूका बाचा जनताले पत्याए । खाँबो चिथोर्न बन्द गरे हुने ।’