काठमाडौं- धादिङ क्षेत्र नम्बर १ बाट राष्ट्रिय स्वतन्त्र पार्टीकी सांसद आशिका तामाङले ललितपुरमा भएको दुई दिने अभिमुखीकरण कक्षबाट धेरै कुरा सिकेको बताएकी छन् ।

उनले बुधबार ललितपुरको रोयल टुलिप होटलमा पत्रकारहरूसँग कुरा गर्दै उनले यस्तो बताएकी हुन् ।

‘अभिमुखीकरण क्लास एकदम राम्रो भइरहेको छ। विवाद केही पनि छैन, मेरोबारेमा मिडियाले विवाद बनाइदिएको हो’, उनले भनिन्, ‘सोझो रुखलाई छानीछानी काटिन्छ भनेझैँ आशिका तामाङलाई बोल्न आउँदैन भनेर उल्लिबिल्ली पारिन्छ ।’

सडकमा दह्रो र खरो प्रश्न उठाउने मान्छे अब जनतालाई खुसी पार्ने कोसिसमा लाग्ने बताइन् । ‘दुई दिने कक्षा राम्रो भएको छ। मलाई नयाँ भनेकाले डर थियो’, उनले भनिन्, ‘सांसददेखि प्रधानमन्त्रीसम्म नयाँ हुँदा कसले गाइड गर्देला भन्ने थियो। तर हामीले एकअर्कालाई चिन्ने अवसर पनि पायौँ ।’