काठमाडौं– राष्ट्रिय स्वतन्त्र पार्टीको अभिमुखीकरण समापन कार्यक्रममा पार्टी सभापति रवि लामिछाने उपस्थित हुने भएका छन्। तर भावी प्रधानमन्त्रीका दाबेदार पार्टीका वरिष्ठ नेता बालेन्द्र शाह भने उपस्थित नहुने भएका छन् ।  

पार्टीका एक नेताले खबरहबलाई दिएको जानकारी अनुसार अभिमुखीकरण समापन कार्यक्रममा एक घण्टा उपस्थित हुन आग्रह गरे पनि बालेनले सेड्युल प्याक भएको बताए ।

उनले व्यस्त भएकोले उपस्थित नहुने जानकारी गराएका छन् । स्वास्थ्य अवस्था र सरकारको तयारीमा लागेकाले बालेन्द्र अभिमुखीकरण समापनमा उपस्थित नहुने जानकारी गराएका हुन् । 

‘हामीले अहिले पनि आउनुस् भनेर जानकारी गराएको हो, तर स्वास्थ्यअवस्था र व्यस्तताका कारण उपस्थित हुन सक्दिनँ भन्नुभयो। पार्टी सभापतिज्यू समापन कार्यक्रममा आउनुहुन्छ’, ती नेताले भने, ‘पार्टी उपसभापति, स्वर्णिम र डीपी, सभापति लामिछाने तथा महामन्त्री कविन्द्र बुलाकोटीले पनि उहाँलाई उपस्थित हुनु भन्नुभएको हो । तर व्यस्तता र स्वास्थ्यका कारण गर्दा नजाने खबर आएको छ ।’

मंगलबार अभिमुखीकरण कार्यक्रममा उपसभापति डीपी अर्यालले समापनका बालेन उपस्थित गराउने प्रयत्न गरिरहेको जानकारी गराएका थिए। 

यता बालेनको सचिवालयले पनि उनी अभिमुखीकरण कार्यक्रममा उपस्थित नहुने योजना रहेको जनाएको छ।